Nou Salte i Nou Responsabilite
Sa lannen nou pe selebre 27enm kanpanny Netwayaz Lemonn, mon oule ankouraz sak sitwayen po reflekte lo zot responsabilite dan proteksyon ek prezervasyon nou lanvironnman. Pandan sa bann lannen, avek sipor gouvernman, bann Lorganizasyon Nongouvernmantal, group kominoter ek bann endividi, nou’n fer bokou progre pou ogmant konsyans e ankouraz aksyon pou gard nou pei prop e an bonn lasante.
Sa lannen, nou pe selebre anba tenm “Nou Salte i Nou Responsabilite” i rapel nou ki i nou devwar e responsabilite pour gard no lanvironnman prop. Deplizanpli nou pe vwar bokou plis dimoun pe konpran lenportans servi bann fasilite piblik byen, redwir salte, e gard nou lanvironnman prop.
Minister i reste angaze pou kontinyen travay ansanm avek piblik afen ki nou kapab kree en bonn kiltir respe pou lanvironnman. Mon demann zot tou dan zot lakour, dan lekol, dan travay ek dan kominote pour sispann bann move pratik, partisip dan bann aktivite netwayaz, e adopte bann labitid pli ver. Pandan bann devlopman otour lakour, annou replant vezetasyon e fer nou pei vin pli ver.
Ansanm, nou kapab kree en Sesel pli prop, pli an bonn lasante e pli dirab. Lavenir nou pei, ek zenerasyon ki pou vini, depan lo sa ki nou fer ozordi.
Nou salte i nou responsabilite.